DAVAO REGION- Gipangunahan sa Philippine Coast Guard (PCG) ang pagpahigayon sa Association of Southeast Asian Nations (ASEAN) Coast Guard Forum nga opisyal nga gi-abrihan kagahapong adlawa sa usaka resort sa Island Garden City Of Samal ug molungtad kini hangtud sa Hulyo 8, 2024.
Ang nahisgutang panagtigum ang gisalmutan sa siyam ka mga kanasuran nga gilangkuban sa Indonesia, Singapore, Thailand, Cambodia, Laos, Malaysia, Myanmar, Vietnam ug lakip na ang Pilipinas.
Gikanayon ni PCG spokesperson , Coast Guard Rear Admiral Armando Balilo, tumong sa nahisgutang panagtagbo nga mapalapdan ug mapalig-on pa ang koordinasyon ug kooperasyon tali sa napulo ka ASEAN member-countries aron matubag ang mga suliran labot sa ilegal nga mga kalihukan sa kadagatan susama sa drug trafficking, human smuggling, illegal fishing, piracy, ug ang pagpasulod sa mga weapons of mass destruction.
Dugang pa ni Balilo nga pinaagi sa ASEAN Coast Guard Forum magbaton ug dalan aron maka-angkon ug usaka tingog ang mga ASEAN countries batok sa nagkadaiyang mga hulga sa kadagatan ug hagit sa seguridad sa rehiyon.
Sa pikas bahin, gikanayon usab ni PCG commandant, Coust Guard Admiral Ronnie Gil Gavan, ang maong panagtigum maghatag ug dakong kahigayunan sa PCG aron makatabang nga ma-inspire ang ilang mga ginsakupan ug magkahiusa alang sa luwas ug malambuon nga ASEAN maritime region ilawom sa international law partikular na ang UNCLOS.
