DAVAO CITY – Luyo sa ilang pagbangutan sa kamatayon sa ilang kabanay, gikatingala sa pamilya ni Arnold Dasan Masamloc ang hinungdan sa iyang kamatayon.
Sa nahimong pakighinabi sa Bombo Radyo Davao sa asawa sa biktima nga si Mary Joy, gikaduda niya ang nahimong resulta sa imbestigasyon sa kapulisan nga pagkalumos ang hinungdan sa kamatayon sa biktima bisan pa man nakahiagum ug samad-samad sa lawas ang biktima.
Kahinumdumang bag-o pa man nahitabo ang krimen, namasahero si Arnold gamit sa iyang motorsiklo apan wala na kini makauli sa ilang panimalay gikan sa Magsaysay.
Hustisya karon ang singgit sa pamilya sa biktima ug nanawagan sab kini ug autopsiya sa patayng lawas sa biktima alang sa tukmang imbestigasyon.
Kasamtangang ginahaya sa Matanao ang patayng lawas ni Arnold ug ubay-ubay sab ang pagpaabot ug pahasubo ang katawhan ngadto sa nabiyaang pamilya.
via || Bombo LJ Florendo
