Nanawagan ang Arsobispo sa Archdiocese of Davao alang sa fairness, dignity, ug unity taliwala sa mga kaguliyang human gidakop si kanhing Pang. Rodrigo Duterte ug gitugyan sa The Hague, Netherlands. Sumala pa sa pastoral message ni Arsobispo Romulo Valles nga ang atong nasod anaa karon sa pagkabahin-bahin tungod sa pagdakop kang kanhi Presidente Rodrigo R. Duterte ug ang iyang pagdala sa The Hague aron magpaabot sa paghusay sa iyahang kaso nga gi-atubang.
Kini nga panghitabo nakapalig-on sa mga panagbangi ug karon usa ka hagit sa atong panaghiusa isip usa ka katawhan. gipaklaro usab niini nga ang Simbahang Katoliko nagpabilin nga usa ka suga sa pagtuo, paglaum, ug gugma. Isip usa ka katawhan, ginaila niini ang kasakit ug kagul-anan nga gibati sa tanang nagkadaiyang dapit, lakip na ang mga nag-antos ug mga biktima sa inhustisya sa nakalabay nga panahon. Gipaluyohan usab niini ang panginahanglan sa hustisya, ingon man ang pagpadayag usab sa mga pagdasig sa espirituhanong pag-ampo alang sa kanhing Pangulo ug sa iyang pamilya nga kini ang giila nga anak sa lokal nga Simbahan ug hinigugma sa kadagahan sa mga magtutuong katoliko.
Dugang pa sa mensahe sa Arsobispo nga ang hustisya kinahanglan nga ipatuman nga adunay pagkamatarong ug integridad. Kinahanglan nga kini gawasnon sa mga pamolitikang katuyuan o personal nga pagpahimulos o dili kaha panimalos. Ning paagiha nag-awhag ang simbahan sa gobyerno nga irespeto ang saktong proseso, mosunod sa balaod, ug magbarug sa baruganan nga ang matag usa wala pa daan gihukman nga sad-an. Sa ingon niini nga pamaagi mahimo nga makab-ot ang tinuod nga kalinaw.
Sa katapusan, nag-awhag ang simbahan sa katawhan ning mahinungdanon nga panahon sa kasaysayan sa atong nasod nga maghiusa kita sa pag-ampo, mangayo sa kaluoy sa Dios ug sa giya sa Espiritu Santo. Dungan usab sa panghinaot nga ang Mahal nga Birhen Maria, Reyna sa Kalinaw, magpataliwala alang kanato ug mogiya sa atong nasod padulong sa tinuod nga hustisya ug malungtaron nga kalinaw.
