DAVAO CITY – Gipaniguro sa Archdiocese of Davao nga hugot nga ipatuman ang safety and health protocols kung ipahigayon na ang Misa de Gallo o simbang gabi sa dakbayan.
Gani, naka plastar na daan ang mga health protocols sa mga simbahan sukad gitugutan nga subling magpahigayon og misa ang syudad.
Subay sa paglugway sa General Community Quarantine (GCQ) status sa syudad, ila sab nga gipaniguro nga 30% capacity lamang ang mamahimong makasulod sa simbahan.
Giawhag sab ang mga manimbahay nga mutuman sa protocols sama sa pagsul-ob og face mask, face shield ug social distancing.
Gilaumang mudagsa ang mga katawhan nga bu-ot mutambong sa simbang gabi karong Desyembre 16 apan kung musobra kini sa 30% seating capacity, mamahimo nga sa gawas na lamang sa simbahan magpundo.
Sumala sa pamahayag ni Parochial Vicar Fr. Voltaire Dimol, dako ang pasalamat niini kang Mayor Inday Sara Duterte-Carpio sa pagtugot sa maong aktibidad gumikan usa kini sa mga importanteng pagsaulog sa kapaskuhan.
Dugang ni Fr. Dimol, himuon nga duruha ka higayon ang Misa de Gallo sa matag adlaw diin ipahigayon alas 4:30 sa kadlawon ang unang misa samtang 5:25 sa kadlawon ang ikaduhang misa aron malikayan ang panagtapok sa katawhan.
