Mokabat sa 94,226 ka mga tawo o 24,468 ka pamilya ang apektado karon sa nagpadayong pag-alburoto sa bulkang Kanlaon sa Isla sa Negros.
Subay sa monitoring sa Department of Social Welfare and Development (DSWD) Disaster Response Operations Management, Information and Communication, ang mga apektado mao ang mga residente gikan sa 30 ka barangay sa Region 6 o Western Visayas ug Region 7 o Central Visayas.
Tungod niini, 1,886 ka pamilya o kapin sa 6,000 ka indibidwal ang kasamtangang nagpabilin sa 20 ka evacuation centers sa duha ka rehiyon.
Samtang kapin sa 3,000 ka pamilya o kapin sa 10,000 ka indibidwal ang temporaryong nagpuyo sa ilang mga kabanay o higala. Sa kinatibuk-an nga 5,179 ka pamilya sa Rehiyon 6 ug 7 ang nagpabiling bakwit.
Gi-report usab sa DSWD nga 5,032 ka mga panimalay sa Rehiyon 6 ang nadaot, usa ang hingpit nga naguba ug 5,031 ang partially damaged.
Agi’g tubag, ang DSWD, lokal nga kagamhanan, non-government organizations (NGOs), ug uban pa nakahatag na og kapin sa P309 milyones nga balor sa hinabang ngadto sa mga apektadong pamilya.
Sa pagkakaron, adunay igong Quick Response Funds sa central office ug uban pang gisang-at nga mga buhatan sa DSWD nga magamit sa pagsuporta sa padayon nga pag-apod-apod sa mga panginahanglanon sa hinabang ngadto sa mga pamilyang apektado sa mga kalihokan sa bulkang Kanlaon.
