DAVAO CITY – Gisaulog sa Anti smoking task force ang ilang ika-17 ka tuig nga anibersaryo sa pagpatuman sa anti smoking campaign sa dakbayan sa Dabaw.
Subay niini, unom ka mga police auxillary ug police officers ang gipasidunggan ug gihatagan og cash gift sa lokal nga kagamhanan gumikan sa ilang kakugi sa pagpatuman sa nahisgutang ordinansa.
Gikanayon ni Dr. Ashley Lopez, Head sa Anti Smoking sa Task force, nga dako ang ilang kalipay sanglit kadaghanan sa mga katawhan ug mga establisamento sa dakbayan sa Dabaw ang mituman sa nahisgutang balaud.
Hinuon, gibutyag niini nga mi-doble ang ihap sa mga nadakpang malapason karong tuiga.
Kini, gumikan na usab sa pagdagsa sa daghang nga bisita ug sa sunod-sunod nga operasyon nga gilusad sa task force.
Dungan sa selebrasyon sa anibersaryo, gisugyot ni Lopez nga usbawan ang multa sa mga madakpan gumikan kay sobra ra kaayo kini ka ubos.
Samtang, gipangunahan usab sa Mobile Patrol group ang pagbaton og pinakadaghan nga nangadakpang violators, gisundan sa Sta Ana PNP ug ika-tulo ang Sasa Police station.
Samtang ang mga pulis nga nakadawat og pasidungog mao sila Police Corporal Michell Humanget, Police Staff Sgt. Peter de Cadiz, Patrol woman Gemalyn Ferrer, Police Corporal Mark Anghelo Garcia, Police Corporal Leonard Abalce ug Ramon Fernandez.
