DAVAO CITY – Hatagan og pagtagad sa buhatan sa Davao City Police Office (DCPO) ang pagpanubay sa mga indibidwal nga nagpaluyo karon sa naghitak nga pagpakatag og sayop ug mga unverified information sa social media ingon man pinaagi sa text messages.
Sa gipagula nga pahayag, gikanayon ni PCol. Alberto Lupaz, Director sa DCPO, hingpit na nilang gisugdan ang pag-imbestiga sa maong mga insidente pinaagi sa pag-refer niini sa Anti-Cybercrime Unit sa kapulisan.
Pinaagi niini, mas matutukan ug mas mahimong dali matud pa ang pag-ila sa mga indibidwal nga hilig mag-post og fake news o mga dili berepikadong impormasyon sa social media.
Kahinumduman nga una na sab nga gipanghimakak sa DCPO nga walay kamatouran ang mikatag nga impormasyon sa facebook mahitungod sa matud pa daghanang mga hold-up incidents nga nahitabo sa syudad ug ning bag-ohay lamang, laing unverified information ang mikatag pinaagi sa text messages nga nagkanayong aduna matud pay kidnapping nga nahitabo sa dakbayan – butang nga hugtanong gipanghimakak sa kapulisan.
Nanawagan ang kapulisan sa Davao nga dili gilayon mutoo sa mga impormasyon gikan sa ubang tao ilabi na kung ang tumong niini mao ang paghatag og kalisang ug kahadlok sa publiko.
