DAVAO CITY – Usa ka konsehal sa Davao City ang nagsugyot nga mopahimutang ug anti bullying help desk sa matag barangay nga maoy moatiman sa mga biktima nga pakyas maka-angkon ug hustisya sa ilang gidangatan aron nga kini ang mahimuan ug hinanaling imbestigasyon ug aksiyon.
Sa pakighinabi sa Bombo Radyo Davao kang Davao City 3rd District Councilor Enzo Villafuerte, gikanayon sa konsehal nga gikalarma karon ang ubay-ubay na pagsaka sa mga kaso sa bullying sa mga iskwelahan ingon man sa mga trabahuan.
Matud pa sa konsehal, mamahimong sakop sa maong ordinansa ang tanang mga lebel sa pampubliko ug pribadong tulunghaan lakip na mga estasblisyemenyto ug workplaces sa dakbayan nga maoy magmugna og anti-bullying policies sa mga nahisgutang lugar.
Pananglitang sa panahong wala giaksyunan ang taho sa usa ka biktima, mamahimong mangilabot ang city anti-bullying council nga magpalihok sa revocation of licensce sa usa ka pribadong tulunghaan og establisyemento.
Sa pikas bahin, pokus sab sa maong ordinansa ang pagpaniid sa mga namatikdang kaso sa bullying sulod sa opisina og trabahuan.
Sumala pa sa opis yal, adunay pending nga susamang balaod nga gisumite sa Kamara sa milabayng katuigan. Apan, aduna gihapo’y aprubadong balaod nga mag-monitor sa gender-based discrimination nga mas giila karong isip Anti-Bastos Law.
Naglaom ang konsehal nga mamahimong supplemental ang maong ordinansa sa syudad sa mga gipasibaw nga mga balaod batok bullying dinhi sa nasud.
Sa pagamugnaong anti-bullying help desk sa dakbayan, sakop niini ang tanang mga panginahanglang interbensyon sama sa physical and mental medication, counseling, lakip na legal assistance sa mga biktima sa bullying.
Gikatakdang makigtabo si Councilor Villauerte sa DOLE, CHED ug sa DepEd aron hisgutan ang may kalabutan sa iyang giduso nga Anti bullying Ordinance sa dakbayan.
Gawas niini, plano usab ni Villafuerte nga makig-estorya sa iyang mga kaubanang konsehal aron kombinsihon ang mga nahisgutan nga suportahan ug uyunan ang nahisgutan niyang sugyot ordinansa gumikan kay maghatag kini ug dakong proteksiyon sa tanan ilabi na sa mga kabataan ug sa mga tinun-an nga padayong nakasinati ug pagpang-bully sa uban.
Sa kasamtangan, anaa na sa ika-duhang pagbasa sa city council ang anti bullying ordinance.
via || Bombo LJF
