Nabaligya sa usa ka auction ang bulawan nga aniduro, nga gihimo gikan sa 18-karat nga bulawan ug gidisenyo sa Italian nga artist nga si Maurizio Cattelan.
Gipahigayon ang pag-auction sa New York niadtong Martes sa kantidad nga $12.1 milyon (kapin sa P700 milyon), sumala sa Sotheby’s auction house.
Ang solid gold toilet nga bulawan gihimo nga adunay gibug-aton nga 101 ka kilo ug fully functional kob magamit gayud ang maong butang.
Nasayran nga ang sinugdanang presyo gibase sa kantidad sa bulawan sa adlaw sa auction, matod sa Sotheby’s sa wala pa nahalin. Nasayran nga si Cattelan (65) naghimo og duha ka bersyon sa gold toilet niadtong 2016 ug gitawag kini og “America.”
Ang usa gipakita sa Guggenheim Museum sa New York, apan gikawat niadtong 2019 sa Blenheim Palace sa England, nga natawhan nga lugar ni Winston Churchill, diin kini gipahulam.
Ang ikaduhang bersyon nabaligya niadtong 2017 ngadto sa usa ka pribadong kolektor, nga gisulod usab sa auction.
Sumala sa US media, ang kolektor mao si billionaire Steve Cohen, tag-iya sa New York Mets baseball team.
Ang pag-auction sa maong artwork nakapukaw og dakong interes samtang nag-andam pa alang sa halin, ug dakong gihulat ang adlaw sa bidding.
Sa wala pa ang auction, gipakita ang “America” sa banyo sa bag-ong headquarters sa Sotheby’s, apan lahi sa nangagi nga mga exhibit, dili tugotan ang bisita nga gamiton kini tungod sa rason sa seguridad.
Si Cattelan, usa ka self-taught Italian artist gikan sa Padua, nakabutang sa iyang dungog pinaagi sa dili kasagarang conceptual artworks.
Niaging tuig, usa ka saging nga gitapot sa bongbong gamit ang tape nga adunay titulo nga “Comedian,” nabaligya usab sa New York og $6.2 milyon.
Human sa baligya, gikaon kini sa buyer, nga mao ang cryptocurrency billionaire Justin Sun, sa publiko.
