DAVAO CITY – Gikasubo sa amahan ni Mariechan Intapaya nga si Junie Intapaya ang nahitabo sa iyang 5 anyos nga kinamanghurang anak nga nakabsan sa kinabuhi atol sa nahitaong aksidente sa Prk. 17, Promise Land, Bunawan, Davao City diin usa siya sa tulo ka mga biktima sa nahitabong bangga tali motorsiklo ug pribadong kotse bandang alas-10 sa buntag, adlawng Sabado.
Sa eklusibong pakighinabi sa Bombo Radyo Davao kang Junie, iyang gipadayag ang iyang kahasubo sa gidangatan sa iyang anak.
Pagbutyag sa amahan nga wala siya niadtong tungura gumikan kay nagtrabaho kini sa usa ka balay sa Quitolao, Bunawan isip panday.
Pag-ulbo sa maong panghitabo dihang nasayran gikan sa iyang kaila nga duna nay dili maayong panghitabo kang Mariechan.
Sa wa damha, iyang nasayran nga sa simpleng pag-uban sa batang biktima sa pagpangampanya sa midagan nga kapitan sa barangay, nalambigit kini sa usa ka aksidente nga iyang gikamatyan.
Bisan pa man niana, gikanayon sa amahan nga andam ang midagan nga kapitan sa barangay nga giilang si Brgy. Bunawan Proper Chairman Ronnie Odeña nga iyang giabaga ang galastuson sa pagpalubong sa iyang anak.
Apan dili pa hingpit nga makadesisyon ang amahan nga pagakasuhan kini gumikan kay wala pa napahiluna ang batang biktima.
via || Bombo LJF
