DAVAO CITY – Nadakpan na sa kapulusan ang usa ka amahan nga gitudlong nanglambos-patay sa iyang 7 ka bulan nga anak sa Sitio Data Lanao, Purok 8, Brgy. Tagaytay, Magsaysay, Davao Del Sur.
Giila ang suspek nga si Angelo Malit, 25 anyos, residente sa naasoy nga dapit.
Nasayran gikan sa inahan nga gipabantayan lamang ang iyang anak sa amahan samtang duna siya’y giatiman uban ang iyang iyaan.
Apan sa wa damha, gikuha sa amahan ang iyang anak gikan sa duyan ug gilambos ang iyang anak sa atubangan mismo sa inahan.
Naigo ang liog ang 7 ka bulan nga anak sa hagdanan sa maong panimalay hinungdan nga natakigan kini.
Naghurementado pa ang suspek ug nanglabay pa kini og bato sa ilang balay maong nangandado ug nagtago na lamang ang mag-iyaan sa sulod samtang gakos pa niini ang naangol nga anak.
Wala na natabang pa og adto sa balay tambalanan ang anak samtang gitago pa kini gumikan sa tumang kahadlok hangtod nga nakabsan na kini sa kinabuhi sa sabakan mismo sa iyang inahan, samtang nakaikyas ang amahan pagkahuman sa insidente.
Malampuson sab nga nadakpan ang suspek kagahapon sa buntag ug kasamtangang tingkagol kini sa Magsaysay Municipal Police.
Una ning tuig 2019, nasayran nga nakahigayon si Angelo sa paglabay sa ilang kamagulangang anak nga 1 ka tuig nga kapin sa pipila ka adlaw human kini gilabay, nakabsan kini sa iyang kinabuhi.
Nahitabo sab kini sa lugar sa suspek sa Brgy. Bacong, Tulunan, North Cotabato.
Desidido ang kaipon nga magpasaka og kasong Parricide batok sa amahan sa biktima.
