Gihaya na ang patay nga lawas sa usa ka senior citizen nga giunay ug patay sa iyahang kaugalingong anak kahapon sa hapon sa Purok Daisy 1, Mapantad, Brgy. Sainz, Mati City, Davao Oriental.
Giila sa kapulisan ang biktima nga si Nilo Tapdasan 75-anyos, usa ka drayber samtang ang gitudlong suspek ang iyahang anak nga si Arnel Tapdasan, hamtong ang panuigon.
Subay sa inisyal nga imbistigayson sa kapulisan, naabtan na lamang sa kabanay ang biktima nga wala nay kinibuhi samtang nakaangkon kini og samad tinigbasan sa iyahang liog nga bahin nga maoy hinungdan sa kamatayon niini.
Nakaangkon og dakong samad sa li-og ang biktima nga gitigbas sa suspetsado. Sumala pa sa report nga gumikan sa kusog nga pagtigbas, lagmit pa maputol ang li-og.
Sa pagkakaron, padayon ang gihimong imbistigasyon aron matumbok ang motibo sa krimen.
Hinuon sumala pa sa kabanay atol sa ilahang pagresponde sa panmalay sa biktima, nakita na lamang niini ang suspek nga anaa lamang sa kilid ug wala kini miikyas nga karon anaa na sa mga otoridad.
Gituohan nga adunay gihambin nga problema sa kaugalingon ang suspetsadong anak, gumikan usab sa mga namatikdan nga panglihok-lihok niini nga daw walay kasayuran sa maong panghitabo nga kini karon ang ipailawom sa paghiling sa mga eksperto.
Buot karon sa kabanay sa biktima nga dili na pagawason ang suspetsado.
