Tumang kasuko ang gibati sa kabanay sa usa ka minatay ngadto sa usa ka pribadong lubnganan dinhi sa dakbayan sa Davao gumikan sa dili matud pa maayo niini nga pagserbisyo.
Kahinumduman nga nag-viral sa social media ang post sa usa ka Doll Boniel Gonzales, pag-umangkon sa minatay, human makita sa caption niini nga “On the spot digging” o pina-abtik nga pagkalot ang gihimo sa maong sementeryo aron lamang malubong ang usa ka 59 anyos nga minatay.
Sumala ni Gonzales, niadtong Agosto 6, 2022, adlaw sa lubong, pag-abot nila sa maong sementeryo, dili matud pa andam ang lubnganan sa iyang uyoan. Gani, matud pa sa mga kabanay nga walay tarong koordinasyon ang sementeryo gumikan gibabagan pa sila sa gate ayha nakasulod gumikan wala matud pay naka-schedule nga lubong niadtong adlawa.
Apan giklaro ni Gonzales nga miadto sila sa opisina sa unang adlaw sa pagkamatay sa iyang uyuan aron ipahibalo sa management nga mu-avail sila og lote nga dugay na nilang nabayaran. Dugang pa niini nga nibayad sila og lain pa nga P30,000 alang sa pagkalot diin ang resibo ug uban pa nga mga dokumento ang anaa kanila.
Sa pagsubay sa talaan sa buhatan sa sementeryo, nasayran nga aduna diay gitakda nga lubong sa maong adlaw apan wala lamang kini ma-relay sa mga kawani nga nagdumala sa entrance nga mao ang hinungdan nga ang pamilya sa namatay ang gibabagan gate.
Matud pa ni Gonzales nga gitugotan sila nga makasulod human sa pipila ka minuto apan dul-an sa duha ka oras sab sila nga nagpaabot gumikan nagkalot pa og lubnganan sa maong mga sementeryo gamit ang gamay nga backhoe.
Sa dihang ilubong na ang minatay, nakurat ang pamilya sa dihang nakadungog sila og kusog nga impact human nga adunay dakong bato ug mga bagal sa yuta ang nahulog sa lubnganan nga miresulta sa pagkaguba sa lungon sa minatay.
Sa dihang mireklamo ang pamilya, gikuha dayon sa mga kawani sa sementeryo ang naguba nga lungon ug giilisan og bag-o gikan sa funeral parlor. Human sa lubong, miangkon si Gonzales nga giduol sila sa usa ka admin sa sementeryo nga nitug-an nga nasubo ang ilang buhatan sa maong hitabo.
