DAVAO CITY – Subling gideklara sa Malacanang ang adlawng Biyernes, Agosto 18, isip special non-working holiday dinhi sa Davao City.
Sigon sa gipakanaog nga Proclamation No. 307, subay kana sa pagsaulugong Indigenous People’s Day ingon man sa ika-38 nga tuig sa Kadayawan Festival.
Pirmado ang maong kamanduan ni Executive Secretary Lucas Bersamin.
Sa pikas bahin, gikanayon ni Captain Hazel Tuazon, tigpamaba sa Davao City Police Office, anaa sa kapin dyes mil ka mga personahe sa Pulis Dabaw ang ipakatap atol sa hugot nga seguridad nga ipatuman sugod sa pag-abli sa kasaulogan karong Agosto 10 latas sa mga nag-unang katikaran sa Kadayawan.
Nanawagan sab ang opisyal nga batasanon sa matag Dabawenyo ang “culture of security” alang sa tunhay ug malinawong kasaulogan.
Pagaatngan sa mga Dabawenyo ang mga dagkong kalihukan sama sa Indak-indak, Pamulak, Hiyas ng Kadayawan, Bantawan, Kasikas, Hudyaka, Habi Kadayawan, ug ang hingpit nang mubalik nga Bombo Radyo and Star FM’s Bangkarera 2023 nga ipahigayon sa Valles Beach Resort Complex, Daliao Toril, karong Agusto 19.
via || Bombo LJF
