Mikabat na sa 848 ang natala nga aftershocks human sa 6.9-magnitude nga linog nga mihapak sa Bogo City, Cebu niadtong Martes sa gabii, sumala sa Philippine Institute of Volcanology and Seismology (PHIVOLCS).
Upat lang niini ang nabati nga adunay kusog gikan magnitude 1.4 hangtod 4.8. Sumala ni PHIVOLCS Director Dr. Teresito Bacolcol, gilauman pa nga mosunod ang daghang aftershocks sa mosunod nga mga adlaw ug kasagaran molungtad pa kini og semana, apan mosamot kini’g kahuyang samtang nagdugay.
Giawhag niini ang mga residente nga dili usa mobalik sa ilang mga pinuy-anan kung adunay makita nga kadaot ug magpakonsulta una sa mga city o municipal engineers.
Sa laing bahin, gikataho sa Department of Health (DOH) nga 63 na ang namatay tungod sa maong linog. Gipahibalo usab ni Health Secretary Ted Herbosa nga tanang pasyente nga naapektuhan sakop sa PhilHealth coverage pinaagi sa no-balance billing aron makapadayon sa pagtambal bisan sa pribadong ospital.
