Migahin ang administrasyong Marcos ug pondo alang sa adjustments sa sweldo sa mga empleyado sa gobyerno. Nag-commit usab ang gobyerno ug dugang benepisyo sa mga nahisgutan.
Gipahayag ni Pangulong Ferdinand Marcos Jr.sa ikatulong State Of the Nation Address (SONA) sa Batasang Pambansa sa Quezon City, adunay malauman ang mga empleyado sa gobyerno ug medical allowance isip dugang benepisyo sa mosunod nga tuig.
Adunay idugang sa sweldo nga makuha sa mga nahisgutan sa upat ka tranches. Gihisgutan usab sa Pangulo nga gilugwayan sa administrasyon niini ang serbisyo sa mga job order ug contract of service personnel nga nagtrabaho sa gobyerno.
Una niini, gipahayag sa Department of Budget and Management (DBM) nga target niining makumpleto ang pagtuon sa posibleng increase sa sweldo sa mga empleyado sa gobyerno sa katapusan sa bulan sa Hunyo ning tuig kasamtangan.
Sa kasamtangan, gi-finalize na sa Compensation and Benefits Study ang salary adjustments sa mga empleyado sa gobyerno.
Matod pa sa DBM, hugot nga ginatun-an ang nagkadaiyang mga aspeto sa kasamtangang compensation system lakip na ang sweldo, mga benepisyo ug allowances.
Ang mamahimong resulta sa pagtuon mao ang basihan aron himuon ang gikinahanglang mga kabag-uhan sa Total Compensation Framework sa civilian government personnel aron maseguro ang patas ug napanahong salary adjustment sa mga empleyado sa kagamhanan.
Sa higayong matapos na ang pagtuon, ipresenta ang mga resulta sa DBM ug sa Governance Commission of GOCCs.
