DAVAO CITY – Gikondena ni ACT Teachers Rep. France Castro ang nahimong kamandoan sa Department of Education (DepEd) batok sa Salugpongan Ta ’Tanu Igkanogon Community Learning Center Inc. (Salugpongan) nga isuspende ang 55 ka mga Lumad schools sa rehiyon.
Kahinumduman nga nagpagula ang DepEd ug suspension order sa milabay nga semana human ang alegasyon sa National Security Adviser ug Director General sa National Security Council nga si Hermogenes Esperon Jr. batok sa maong tulonghaan.
Gihatagan sab sa DepEd ang kadumalahan sa nahisgutan nga tulonghaan ug lima ka adlaw bakwion ang alegasyon nga nalambigit sila sa kalihokan sa mga rebelde.
Una ng mihangyo si Ma. Eugenia Nolasco, executive director sa Salugpongan ug lima ka adlaw nga lugway hinungdan nga gitugutan kini ni DepEd Regional Director Evelyn Fetalvero ug hangtud sa Hulyo 22.
Gisaway ni Castro ang DepEd nga mipabor sumala pa sa mga akusasyon sa National Task Force to End Local Communist Armed Conflict (NTF) sa pagpanguna ni Esperon kaysa sa hangyo sa Salugpongan alang sa usa ka dayalogo.
Sa kasamtangan, adunay mga police auxiliary ug security guard ang gi-deploy sa Department of Education XI office isip preperasyon alang sa posibleng lihok protesta nga himuon human ang pagsuspende sa operasyon sa Salugpongan Ta’ Tanu Igkanogon Community Learning Center.
Bugtong 11 sa 55 Lumad schools ang nag-operate ayha gipagula sa DepEd ang kamandoan. Una ng gibutyag sa School management nga pugsanong gipasara ang uban nila nga mga tulonghaan gumikan sa harrassment nga gihimo sa militar.
