-- ADVERTISEMENT --

Gitandi ni Philippine Coast Guard (PCG) Rear Adm. Jay Tarriela ang mga nasud nga nangahasi sa West Philippine Sea (WPS) ngadto sa karakter nga si Voldemort, ang kontrabida sa usa ka sikat nga novel ug salida.

Gipahayag kini ni Tarriela atol sa Manila Dialogue on the South China Sea kaniadtong Martes, Nobyembre 17, 2026 diin iyang giingon nga dili na magduha-duha ang internasyonal nga komunidad sa pag-ila kung kinsa ang nang-agresibo, biktima ug nangdaog-daog sa nagpadayong tensiyon sa maong kadagatan.

Matud pa sa opisyal, nakatabang ang transparency campaign sa Pilipinas aron mas hayag nga mailhan sa ubang nasud ang mga responsable sa agresibong mga lihok sa kadagatan, diin kaniadto naglikay ang pipila ka gobyerno sa direktang paghingalan sa mga nasud nga nalambigit.

Apan gisupak ni Sophie Wushuang Yi sa Beijing-based Grandview Institution, nga usa usab ka dugay fan sa maong salida, ang maong pagtandi. Matud niya, ang gihulagway nga Voldemort sa usa ka nasud mahimong Dumbledore o bayani alang sa laing nasud.

Gipunting usab ni Yi ang kabalaka sa Beijing sa hiniusang military exercises sa Pilipinas, Estados Unidos ug Japan, lakip ang Balikatan exercises.

-- ADVERTISEMENT --

Kahinumdoman nga niadtong Nobyembre 8, gipahinumdoman sa Department of Foreign Affairs (DFA) ang mga opisyal sa gobyerno ug militar nga ipahiuyon ang ilang mga pahayag sa publikong palisiya sa langyawnong relasyon nga gipatuman sa administrasyon ni Pangulong Ferdinand Marcos Jr.

Gipasabot usab sa DFA nga ang transparency campaign usa lamang ka himan sa pagdokumento ug pagbutyag sa mga insidente sa West Philippine Sea ug kinahanglan kining mosuporta, dili mopuli, sa mga lakang sa diplomasya ug legal nga proseso sa nasud.