Gipalig-on sa Department of Energy – Visayas Field Office (DOE-VFO) ang pagpahigayon og mga inspeksyon sa nagkalainlaing fuel retail outlets sa tibuok rehiyon aron masiguro ang hugot ug matinud-anong pagsunod sa dakong pagpaubos sa presyo sa lana nga nagsugod niadtong Nobyembre 10.
Pinaagi sa ilang mga monitoring team, hugot nga gisusi sa ahensya ang mga presyo sa mga bomba (pump prices) ug mga price display board aron masiguro nga husto ang pagpatuman sa gipahibalo nga pagpaubos sa presyo, nga maghatag og kahigayonan sa mga motorista ug ordinaryong konsumidor nga hingpit nga makabenepisyo niini.
Kalabot niini, gipangayoan dayon og katin-awan ang mga establisyimento nga napakyas sa pagsunod sa direktiba.
Nagpagawas na ang DOE og mga Show Cause Order (SCO) batok sa mga retail outlet nga wala mosunod sa mga lagda, nga nagmando kanila sa pagsumite og pormal nga sinulat nga katin-awan sulod sa 24 oras.
Aron mas mapalapad pa ang sakop sa ilang pagbantay, nakigtambayayong usab ang ahensya sa mga lokal nga pangagamhanan (LGUs) sa tibuok rehiyon aron masiguro nga walay gasolinahan nga makalikay sa mga gipahamtang nga regulasyon.
Giawhag usab sa DOE ang publiko nga magmatngon ug ireport ang bisan unsang kadudahang iregularidad sa presyo.
