Sugdan sa Land Transportation Office o LTO sa Nobyembre 15, 2026 ang pagbawi sa lisensya sa mga drayber nga mapamatud-ang nagmaneho mga langgo sa ilimnong makahubog, isip kabahin sa pagpalig-on sa kaluwasan sa dalan sa nagkaduol nga Pasko ug Bag-ong Tuig.
Sumala kang LTO Chief Assistant Secretary Markus Lacanilao, ipatuman ang maong polisiya batok sa mga drayber nga mapamatud-ang nakainom og alkohol pinaagi sa mga pagsulay nga gitakda sa balaod, lakip ang field sobriety tests ug breathalyzer test.
Mahimong iapela sa mga apektadong drayber ang pagbawi sa ilang lisensya. Ang ilang mga kaso pagadumalahan sa LTO Intelligence and Investigation Division ug ipailalom sa mga pagdungog sa dili pa magpagawas og pinal nga resolusyon.
Sa laing bahin, adunay mga silot nga gitakda ubos sa Republic Act No. 10586 o Anti-Drunk and Drugged Driving Act of 2013, depende sa resulta sa paglapas.
Kung walay nasamdan o namatay, naglatid ang balaod og tulo ka bulan nga pagkabilanggo ug multa nga mokabat sa 20,000-80,000 pesos.
Apan kung adunay pisikal nga kadaot, ang multa mahimong mokabat sa 100,000-200,000 pesos, dugang sa silot nga gitakda sa Revised Penal Code, depende sa kaso. Kung adunay namatay, ang multa mahimong mokabat sa 300,000-500,000 pesos, dugang sa silot alang sa homicide.
Ubos usab sa maong balaod, ang lisensya sa non-professional driver nga unang higayon nga makonbikto mahimong suspindihon sulod sa 12 ka bulan, samtang ang ikaduhang conviction mahimong mosangpot sa permanenteng pagbawi niini. Alang sa professional driver, mahimong permanente ang pagbawi sa lisensya sa unang conviction.
Samtang, giklaro ni Lacanilao nga sa mas bug-at nga mga insidente, ilabina kung adunay namatay, mahimong permanente ang pagbawi sa lisensya.
Gipahinumdoman ang mga motorista nga likayan ang pagmaneho human makainom og alkohol ug gamiton ang laing luwas nga paagi sa pagpauli aron malikayan ang disgrasya sa dalan.
