Giusisa sa mga senator-judge ang sunod-sunod nga transaksyon diin kapin ₱96 milyon nga pondo gikan sa joint account nila kanhi Pangulong Rodrigo Duterte ug Vice President Sara Duterte ang balik-balik nga gigamit sa pagkuha og manager’s checks.
Sumala kang Marwin Galvez, division head sa Bank of the Philippine Islands (BPI) Central Metro Manila Branch, kung gamiton ang pondo sa pagkuha og manager’s check, dili na kini maapil sa balance sa gigikanang account samtang outstanding pa ang tseke.
Sa maong kahimtang, nagpabilin ang kwarta sa settlement account sa bangko alang sa manager’s check.
Base sa records nga gipresentar sa prosecution, adunay duha ka time deposit nga mokabat sa ₱41 milyon ug ₱55 milyon, nga hiniusang milapas sa ₱96 milyon.
Alang kang Prosecutor Atty. James Bryan Ibrahim Alih, gigamit ang maong mga pondo sa pagkuha og manager’s checks nga wala dayon ma-encash. Sa ulahi, gibalik ang mga tseke ug gipulihan og bag-ong manager’s checks.
Miabot sa unom ka sunod-sunod nga cycle ang maong transaksyon gikan 2011 hangtod 2013.
Sa maong pattern nakabase si Senator-judge Vicente Sotto III sa iyang pagtawag niini og “tinikling,” nga nagtumong sa balik-balik nga pag-isyu, dili paggamit, pagbalik ug pag-ilis sa manager’s checks.
Nangutana usab si Senator-judge Francis “Kiko” Pangilinan nganong wala na makita sa account balance ang ₱41 milyon samtang outstanding pa ang manager’s check.
Sa iyang tubag, giklaro ni Galvez nga anaa ang kwarta sa settlement account sa bangko ug dili na apil sa balance sa source account.
Samtang, si Senator-judge Erwin Tulfo nangutana kung na-convert ba ngadto sa manager’s checks ang maong mga pondo samtang public officials ang mga account holder.
Gikumpirma ni Galvez nga nahitabo kini sulod sa covered period, apan wala pa niya matino kung kinsa ang sa ulahi nag-encash o nagdeposito sa mga tseke hangtod nga masusi ang mga rekord.
Sa laing bahin, gikumpara ni Senate President Sherwin Gatchalian ang maong bank records sa Statement of Assets, Liabilities and Net Worth o SALN ni Vice President Sara Duterte, ilabina ang duha ka time deposit nga hiniusang milapas sa ₱96 milyon sa wala pa gibalhin ang mga pondo pinaagi sa manager’s checks.
