Nagpagawas ang Department of Budget and Management o DBM og P27.410 bilyon nga pondo alang sa medical assistance sa mga kabus ug nanginahanglan nga mga Pilipino sa tibuok nasod.
Sumala pa sa DBM, gamiton ang maong pondo sa padayong pagpatuman sa Medical Assistance to Indigent and Financially Incapacitated Patients o MAIFIP Program sa Department of Health o DOH.
Lakip sa tabang ubos sa maong programa ang mga pasyenteng dili hingpit nga makabayad sa ilang gasto sa pagpaospital ug uban pang serbisyong medikal, lakip ang medisina, emergency treatment, professional fees sa doktor ug uban pang panginahanglanon sa panglawas.
Dugang pa niini, dakong bahin sa pondo igahin ngadto sa Centers for Health Development o CHDs aron masuportahan ang paghatag og medical assistance pinaagi sa ilang mga partner nga lokal nga mga ospital sa gobyerno, pribadong health institutions ug uban pang health facilities sa nasod.
Suportahan usab sa maong pondo ang mga ospital sa DOH sa Metro Manila ug sa ubang rehiyon, lakip ang pagpatuman sa eMAIFIP pinaagi sa eGovPH Super App.
Sumala ni Budget Secretary Kim Robert de Leon, tumong sa pagpagawas sa maong pondo nga mahatagan og direktang tabang ang mga nanginahanglan sa lebel mismo sa ospital aron dili na kinahanglan nga pas-anon sa mga pamilya gikan sa ilang kaugalingong bulsa ang dagkong gasto sa pagpaospital.
Sa kasamtangan, padayon ang pagpatuman sa MAIFIP Program alang sa mga Pilipinong nanginahanglan og pinansyal nga tabang alang sa ilang mga panginahanglanon sa panglawas.
