Nagsang-at si Sen. Panfilo “Ping” Lacson og duha ka sugyot balaodnon aron ipataas gikan 56 ngadto sa 57 anyos ang compulsory retirement age sa uniformed personnel sa Philippine National Police (PNP), Bureau of Jail Management and Penology (BJMP), ug Bureau of Fire Protection (BFP).
Ubos sa Senate Bill 2395, ipataas sa 57 ang retirement age sa PNP aron mas mapahimuslan ang kasinatian ug liderato sa senior personnel ug adunay panahon nga mapasa nila ang ilang kahibalo sa mas batan-ong opisyal.
Sa Senate Bill 2396, parehas nga retirement age ang ipatuman sa BJMP ug BFP.
Matud ni Lacson, nakaangay kini sa pag-usab sa retirement age sa Armed Forces of the Philippines.
Base sa iyang datos, adunay 230,410 ka uniformed personnel ang PNP, 26,000 sa BJMP ug 41,286 sa BFP.
Sa PNP, ang personnel nga wala pay usa ka tuig sa serbisyo human maaprobahan ang balaod mahimong mopili gihapon nga moretiro sa edad 56.
Magpabilin usab sa 56 ang retirement age sa kasamtangang PNP chief, samtang ang pipila ka taas nga opisyal sa BJMP ug BFP mahimong ma-extend og usa ka tuig lamang.
