Posibleng ibalhin ngadto sa kustodiya sa US Marshals si Pastor Apollo Quiboloy kung aprobahan sa gobyerno sa Pilipinas ang iyang extradition ngadto sa Estados Unidos.
Sumala sa Philippine Ambassador to the US Jose Manuel “Babe” Romualdez, nakadawat na ang Pilipinas og pormal nga hangyo gikan sa gobyerno sa Amerika alang sa extradition ni Quiboloy.
Gipasabot ni Romualdez nga adunay kaugalingong eroplano ang US Marshals nga mahimong mobiyahe paingon sa Pilipinas aron sundon si Quiboloy ug dad-on direkta ngadto sa lugar sa Amerika diin gisang-at ang iyang mga kaso sa Los Angeles.
Dugang pa niini, posible usab nga moapil ang mga ahente sa Federal Bureau of Investigation (FBI) sa maong operasyon aron masiguro ang hapsay nga pagbalhin sa kustodiya.
Sumala pa sa embahador, giisip nga high-profile international case ang kaso ni Quiboloy tungod sa mga alegasyon nga may kalabotan sa human trafficking ug sex trafficking.
Kahinumduman nga gipadala sa gobyerno sa Amerika ang extradition request ngadto sa Department of Foreign Affairs (DFA) niadtong Hulyo ug giendorso na kini ngadto sa Department of Justice (DOJ) alang sa legal nga proseso.
Sa pagkakaron, nag-atubang si Quiboloy og mga kaso sa Estados Unidos sama sa sex trafficking, bulk cash smuggling, fraud, ug racketeering, samtang nagpabilin kining nakapiit sa Pasig City Jail tungod sa laing kaso nga may kalabotan sa qualified human trafficking ug pang-abuso.
Samtang, giinsistir sa kampo ni Quiboloy pinaagi sa iyang abogado nga si Atty. Israelito Torreon nga dili dayon matuman ang extradition tungod kay nagpadayon pa ang iyang mga kaso sa lokal nga korte. Hinuon, mahimo gihapon kining ipadayon depende sa mahimong desisyon sa DOJ ug sa hukmanan.
