Pormal ng gipadala sa Senate Impeachment Court ang mga subpoena alang sa mga rekord sa bangko, buhis, ug pinansyal ni Bise Presidente Sara Duterte, sa iyang bana nga si Atty. Manases Carpio, ug sa mga kompanyang nalambigit kanila.
Sumala pa sa impeachment court, ipagawas ang maong mga dokumento aron masusi ang mga alegasyon sa wala mapatin-aw nga kabtangan o unexplained wealth nga gilakip sa Article II sa Articles of Impeachment. Dugang pa niini, gimandoan sa korte ang Bureau of Internal Revenue o BIR, Anti-Money Laundering Council o AMLC, ug nagkalain-laing banking institutions nga isumite ang gikinahanglang mga dokumento ngadto sa Clerk of Court hangtod sa Hulyo 30, 2026, alas-9:00 sa buntag.
Matud ni Senate Impeachment Court spokesperson Reginald Tongol, adunay pipila ka mga institusyon nga mituman na sa direktiba sa korte ug nakapasa na sa mga dokumento, lakip ang mga bank check nga may kalabutan kang Bise Presidente Duterte. Kahinumduman nga bisan pa gipaboran sa korte ang hangyo sa prosekusyon nga mag-isyu og subpoena alang sa bank ug tax records sa bise presidente, adunay lima ka senator-judge nga misupak sa maong desisyon.
Lakip sa misupak sila si Senador Alan Peter Cayetano, Pia Cayetano, Imee Marcos, Loren Legarda, Camille Villar, ug Bong Go, diin ilang gitutokan ilabi na ang pagpagawas sa mga dokumento nga adunay kalabutan sa panahon sa wala pa maangkon ni Duterte ang pagka-bise presidente.
Sa kasamtangan, ipadayon pag-usab ang impeachment trial ni VP Sara Duterte karong Miyerkules, Hulyo 29, ubos sa bag-ong iskedyul nga sugod alas-10:00 sa buntag hangtod alas-3:00 sa hapon.
