Nagpabiling ubos sa Yellow Alert ang Visayas Grid niadtong Lunes, Hunyo 29, sugod alas-6:00 sa buntag hangtod alas-7:00 sa gabii, sumala pa sa National Grid Corporation of the Philippines (NGCP), tungod sa nipis nga reserba sa suplay sa kuryente human magka-aberya ang pipila ka dagkong coal-fired power plants sa rehiyon.
Sumala pa, gipadayag sa NGCP nga adunay 2,571 megawatts (MW) nga available capacity batok sa 2,288 MW nga peak demand. Apan, tungod sa forced outage sa pipila ka planta ug sa limitado nga operasyon sa uban, nagpabiling ubos ang reserbang kuryente sa grid.Lakip sa gipasabot sa ahensya nga ang Yellow Alert ipatuman kon nipis na ang reserbang suplay sa kuryente.
Bisan igo pa ang kuryente alang sa kasamtangang panginahanglan, posible nga maapektuhan ang sistema kon adunay laing planta nga kalit nga magka-aberya. Sa kasamtangan, nagmando na ang Department of Energy (DOE) og diha-diha nga inspeksyon ug koordinasyon aron mapasig-uli sa operasyon ang mga apektadong planta. Lakip sa gikonsiderar nga mga lakang ang paggamit sa power barges ug generator sets aron makatabang sa suplay sa kuryente.
Sa pagkakaron, wala pay direktang epekto ang Yellow Alert sa presyo sa kuryente, apan gipasidan-an nga posible ang gamayng pagsaka sa bayranan tungod sa paggamit sa mas mahal nga diesel power plants isip temporaryong alternatibo.
