Moakabat na sa kapin 400 ka pamilya ang apektado sa dakong sunog nga nahitabo sa Km. 17, Vista Mar, Muslim Village sa Barangay Ilang pasado alas dos kaganinang kadlawon. Base sa inisyal nga report, mokabat sa 120 ka mga estruktura ang nalamoy sa kalayo atol sa maong insidente.
Matod sa mga residente, paspas kaayo ang pagkatag sa kalayo nga hinungdan sa pagkasunog sa upat ka block sa maong komunidad. Gituohang nagsugod ang sunog sa usa ka duha ka andanang panimalay diin usa ka napasagdan nga kandila ang posibleng hinungdan sa pag-ulbo sa kalayo atol sa brownout sa lugar.
Samtang nagpadayon ang imbestigasyon sa mga otoridad aron matino ang tibuok nga kadaot ug kantidad sa damyos, nagpahigayon na usab og espesyal nga sesyon ang Barangay Ilang aron hisgutan ang mga lakang ug tabang alang sa mga biktima sa sunog.Sa pagkakaron, ang mga apektadong residente temporaryong gipapuyo sa Pag-asa Ilang Covered Court nga adunay kapasidad sa pag-accommodate og kapin 200 ka mga indibidwal.
Padayon usab ang koordinasyon sa lokal nga panggamhanan ug mga ahensya aron masiguro ang hustong pag-atiman ug suporta sa mga naapektuhan sa maong trahedya.
