Gipadayag sa Philippine National POlice (PNP) nga andam kini nga sikopon si Senador Ronald “Bato” dela Rosa bisan unsa mang orasa aron implementa ang arrest warrant gikan sa International Criminal Court (ICC), apan gikinahanglan kini nga moagi sa saktong proseso pinaagi sa Interpol ug court order.
Sumala kang PNP spokesperson PBGen Randulf Tuaño, tin-aw ang direktiba ni Interior Secretary Jonvic Remulla ngadto sa PNP nga ipatuman lamang ang contingency plan kung adunay kumpirmadong ICC Warrant.
Gipaklaro usab ni Tuaño nga kinahanglan usa nga ipaagi ang warrant sa Interpol usa magpatuman ug saktong mando gikan sa local court ayha kini ipatuman.
Kahinumduman nga gikumpirma sa ICC niadtong Lunes nga nagpagawas kini og warrant of arrest batok kay Dela Rosa nga may kalabutan sa pagpatay ilawom sa ‘war on drugs’ campaign niadtong administrasyon ni kanhi Pangulong Rodrigo Duterte.
Samtang, gikataho sab ni kanhi senador Antonio Trillanes IV nga napadala na kuno sa Presidential Center for Transnational Center (PCTC) ang kopya sa ICC arrest warrant.
Sa pagkakaron, anaa sa protective custody sa Senado si Dela Rosa.
Gawas niini nagduso ang kampo sa senador og manifestion sa Korte Suprema aron mangayo og hinanaling judicial protection batok sa posibling pagbalhin kaniya sa ICC.
