Gilauman nga mas mapagaan na ang pinansyal nga kabug-at sa mga Pilipino nga adunay grabeng sakit human pormal nga gipagawas sa Bureau of Internal Revenue (BIR) ang bag-ong listahan sa mga tambal nga VAT-exempt. Sumala pa sa Revenue Memorandum Circular (RMC) No. 27-2026 nga giisyu niadtong Abril 8, 2026, miabot sa 2,263 ka klase sa tambal ang gi-exempt sa Value-Added Tax, base sa aprobasyon sa Food and Drug Administration (FDA) sa Department of Health (DOH).
Lakip sa pinakadaghang natabonan sa listahan mao ang mga tambal para sa cancer nga moabot sa 702 ka klase.Dugang pa niini, giapil usab ang 535 ka tambal alang sa hypertension, 327 para sa diabetes, 300 para sa mental illness, 171 para sa high cholesterol, 152 para sa kidney disease, ug 76 para sa tuberculosis. Subay sa Republic Act No. 10963 o TRAIN Law ug Republic Act No. 11534 o CREATE Act, ipatuman ang maong tax exemption isip suporta sa pagpaubos sa gasto sa medikasyon.
Sumala pa ni BIR Commissioner Charlito Martin R. Mendoza, ang maong lakang kabahin sa mandato sa gobyerno nga mapakunhod ang presyo sa tambal sa nasud.Gisuportahan usab kini sa Department of Finance (DOF) ubos sa pagpanguna ni Finance Secretary Frederick D. Go.Sa kasamtangan, gipatin-aw nga ang maong inisyatibo direktang tubag sa direktiba ni Pangulong Ferdinand R. Marcos Jr. nga himuong mas accessible ug mas barato ang serbisyong medikal para sa tanang Pilipino.Gipatin-aw pa sa BIR nga ang RMC No. 27-2026 mopuli sa tanang daang circulars nga may kalabotan sa maong polisiya.
