Natala ang dakong kalampusan sa Davao Oriental Police Provincial Office (DOPPO) alang sa pagmintina sa kahapsay og kalinaw pinaagi sa pagpahugot sa ilang mga kampanya batok kriminalidad sa tibuok probinsya.
Sumala kang DOPPO Director Police Colonel Ritchie Bucol, gipasalig niini nga ang ilahang mga paningkamot nakalinyada sa direktiba sa Police Regional Office (PRO) 11 nga gipangulohan ni PBGen Leon Victor Rosete ug sa Provincial Government ubos sa liderato ni Governor Nelson Dayanghirang.
Subay sa ilahang gipaguwa nga taho, gikan Hulyo 7 sa miaging tuig hangtod Abril 2, 2026, gipakusgan sa DOPPO ang ilahang operasyon ug kampanya batok sa ilegal nga mga kalihokan.
Sa kampanya batok sa ilegal nga droga, nakapahigayon ang DOPPO og 273 ka operasyon nga miresulta sa pagkadakop sa 298 ka indibidwal.
Narekober nga droga nga adunay 1,604.2767 gramos sa shabu ug 698.8627 gramos lakip ang 136 ka tanom nga marijuana, nga adunay kinatibuk-ang kantidad nga ₱11,052,580.34.
Sa kampanya batok sa loose firearms, nakapahigayon og 342 ka operasyon nga miresulta sa 35 ka pagdakop, 44 ka armas ang nakompiska, ug 307 ka armas ang boluntaryong gitugyan, nga anaa sa kinatibuk-an nga 351 ka armas.
Samtang ubos sa kampanya batok sa smuggled cigarettes (RA 10643), nakapahigayon ang mga otoridad og 67 ka operasyon ug 67 ka mga pagdakop, ug nakompiska ang 10,527 ka reams, 29,414 ka pakete, 61 ka sako, 54 ka kahon, ug 23 ka kahon sa ilegal nga sigarilyo.
Sa kampanya batok sa mga wanted person, nakaselbi ang kapulisan og 289 ka warrant of arrest, lakip ang 166 ka most wanted person ug 173 ka ubang pinagit nga mga indibidwal.
Samtang, sa kampanya batok sa ilegal nga sugal, nakarekord og 177 ka operasyon, 160 ka pagdakop, ug nakumpiska ang ₱79,342.25 nga kantidad sa kita gikan sa sugal.
Sa pagpapatuman sa balaod kabahin sa kinaiyahan, 6 ka operasyon batok sa illegal logging ang miresulta sa 6 ka pagdakop ug nakompiskar og 10,176.143 board feet sa ilegal nga troso.
Sa kampanya batok sa illegal fishing, nakapahigayon usab og 12 ka operasyon, 17 ka indibidwal ang nadakpan, ug nakumpiska anga mga kagamitan nga nagkantidad og ₱251,775.00. Nakapasaka usab og 12 ka kaso sa korte ang mga otoridad.
Sa gipahigayon usab nga traffic enforcement ubos sa RA 4136, nakapahigayon ang kapulisan og 943 ka operasyon ug nakahatag og 943 ka violations (TOP/MVIR).
Sa katapusan, sa pagpatuman sa city ug municipal ordinances, nakapahigayon usab ang mga otoridad og 2,582 ka operasyon, naka-isyu og 2,519 ka citation tickets ug 63 ka warnings.
Sumala kang Col. Bucol, ang maong mga paningkamot nakatampo sa pagpalig-on sa kaluwasan sa publiko, pagpauswag sa pagpapatuman sa balaod, ug pagtaas sa pagsalig sa komunidad.
Bisan pa sa padayon nga pagpatuman sa maampingon ug gipalig-on nga operasyon, gipunting usab ni Bucol ang moral recovery sa mga pulis ug Persons Deprived of Liberty (PDL).
Gilusad usab ni Bucol ang programang Oplan Kahayag nga naghatag og paglaum sa Children in Conflict with the Law (CICL) pinaagi sa paghatag kanila og oportunidad nga makapadayon sa ilahang pag-eskwela.
Dugang pa, napalig-on sa DOPPO ang ilahang pakigtambayayong sa mga pribadong sektor ug mga institusyon nga importante sa paglig-on sa kahapsay ug kalinaw sa probinsya.
