Ginasusi karon sa Embassy of the Philippines sa United Arab Emirates (UAE) ang mga taho nga adunay duha ka Pilipino nga gidakop sa Dubai tungod sa giingong pagrekord ug pagpakaylap sa mga video nga may kalabotan sa bag-ohay nga mga pag-atake sa maong nasud.
Sa usa ka pahayag, gibutyag sa Philippine Embassy sa Abu Dhabi ug Consulate General sa Dubai nga nangayo na sila og opisyal nga kumpirmasyon gikan sa mga awtoridad sa UAE mahitungod sa pagkatao, kahimtang, ug legal nga sitwasyon sa duha ka Pilipino.
Matod sa mga opisyal, ginaila sa Pilipinas ang soberanya sa UAE ug ang ilahang pagpatuman sa balaod may kalabotan sa national security, cybercrime, ug public order.
Gipahinumduman usab sa mga awtoridad sa UAE nga ang nagpakaylap sa sayop o dili beripikadong impormasyon may kalabotan sa seguridad lakip na ang mga video sa air defense interceptions, pag-atake sa mga landmark, ug bisan AI-generated videos mahimong isipon nga krimen nga adunay tugbang nga pagkabilanggo ug dako nga multa.
Tungod niini, nanawagan ang mga diplomatiko nga opisyal sa mga Pilipino sa UAE nga magbantay pag-ayo sa ilahang mga aktibidad sa internet.
Gitambagan ang komunidad nga likayan ang pagkuha og video, pag-post sa internet, o pagkomento sa mga isyung pangseguridad nga wala pa makumpirma, ug mosalig lamang sa mga opisyal nga pahayag sa gobyerno sa UAE.
Base sa mga taho, lakip ang duha ka Pilipino sa 25 ka indibidwal nga giingong nadakpan tungod sa pagpakaylap og video sa internet kalabot sa mga pag-atake.
Lakip sa mga nadakpan ang pipila ka langyaw nga gikan sa India, Pakistan, ug Bangladesh.
