Nakapaslak sa selda ang kapin 1,100 ka mga indibidwal human sa gihimong lahos-laing operasyon sa Philippine National Police (PNP) sa tibuok nasud atol sa Undas 2025.
Base sa opisyal nga datos sa PNP, 1,163 katao ang nadakpan gikan sa 1,391 ka operasyon nga gipahigayon gikan Oktubre 31 hangtod Nobyembre 2. Sa maong gidaghanon, 517 niini ang adunay outstanding warrant of arrest alang sa nagkalain-laing krimen.
Gipahigayon usab ang mga operasyon batok sa iligal nga droga (307 kaso), iligal nga sugal (223 kaso), ug mga loose firearms (199 kaso) diin labaw 151,000 gramo sa ginadiling droga ang nakumpiska sa mga operatiba.
Gipahibalo pa sa PNP nga 92,894 ka personahe gikan sa nagkadaiyang ahensya ang gipakatap sa tibuok nasud aron masiguro ang kalinaw ug kahapsay sa pagsaulog sa Araw ng mga Santo ug Araw ng mga Kalag. Lakip niini ang 32,317 ka pulis, 18,838 gikan sa AFP, BFP ug Coast Guard, ug 41,739 ka force multipliers nga naglangkob sa mga barangay tanod, volunteers, ug security auxiliaries.
Sa higayon usab sa operasyon, nakumpiska sa mga otoridad ang 478 ka mga patalim, 65 ka botelya sa alak, 52 ka baraha, ug ubang mga ipinagbabawal nga gamit sulod sa sementeryo ug pampublikong lugar.
Gipasalig sa PNP nga magpadayon ang ilang hugot nga pagbantay ug pagpatuman sa balaod aron malikayan ang krimen ug masiguro ang kaluwasan sa publiko human sa kalihokan sa Undas 2025.
