Arestado ang 15 anyos nga lalaki human niining gisumbag-patay ang iyang 55-anyos nga inahan.
Sa dihang nakaplagan ang patayng lawas sa biktima sulod sa ilang panimalay sa Barangay Northern Poblacion sa lungsod sa Plaridel, Misamis Occidental, nanimaho na matud pa kini human nga gitaguan sa suspek ang lawas sa iyang inahan.
Nasayran nga sa dihang gisumbag sa suspek ang biktima, naigo matud pa ang ulo niini sa salog.
Hinoon, mitahan gilayon ang suspek sa kapulisan usa kaadlaw ang milabay human nga madiskubrehan ang lawas sa inahan nga gitabunan.
Sa nahimong imbestigasyon sa kapulisan, gisaysay sa suspek nga naglalis matud pa sila iyang inahan niadtong Agosto 15 ning tuiga sa dihang nangayo kini og pagkaon, apan gidid-an matud pa kini sa iyang biktima rason nga nasumbag niini iyang ginikanan ug naparok ang ulo sa salog nga maoy rason sa kamatayon niini.
Apan, inay nga mangayo og tabang, giguyod matud pa sa suspek ang iyang inahan sa kwarto ug gitabunan ang nawon niini, gilimpyuhan ang dugo sa salog, dayon misibat.
Mag-atubang og kasong parricide ang suspek, apan ang korte ang maghukom og kasuhan kini gumikan sa pangidaron niini.
