Nag-ani ug kasamok ang usa ka sesyon sa inom sa Barangay Talomo, Davao City, human kini mauwi sa usa ka madugong panagbangi nga nagresulta sa pagkamatay sa usa ka lalaki.
Sumala sa kasayuran nga nakuha sa awtoridad, ang biktima nga si Peter Paul Caro Meligrito, residente sa Purok 3-D, Barangay Talomo, nag-inom uban sa iyang higala nga si Arvin Sisneros.
Apil sa kaatbang sa maong inom ang duha pa ka lalaki nga nailhan nga sila si Dino Pindaw, 33 anyos, usa ka ice drop vendor, ug Lorito, 31 anyos, parehong residente sa Kalye apeke, Calinan District.
Sumala pa ni Arvin, nga Samtang nagapadayon ang ilang inom, kalit nga nagmaoy ang mga suspetsado.
Sa kasamtangan sa ilang panag-inom, gitudlo-tudlo ni Dino si Meligrito, nga maoy hinungdan nga naglagot kini ug kalit nga gisumbag si Dino.
Nakurat si Arvin sa nahitabo ug dali siyang nangayo ug tabang sa usa ka security guard sa duol nga convenience store. Sa pikas bahin, gisaysay sa mga suspetsado nga nag-inom lang sila og kalit lang silang gipang-atake ni Meligrito.
Sa ilang depensa, ilang giangkon nga ilang gibunalan kini gamit ang dospordos nga kahoy aron mapugngan ang sunod nga pag-atake.
Apan, tungod sa kakusog sa ilang pagpamunal, naangol pag-ayo si Meligrito nga misangpot sa iyang kamatayon.
Sa kasamtangan, ang mga suspetsado anaa na sa kwerpo sa mga awtoridad sa Calinan Police Station 10, ug sumala pa posible silang mag-atubang sa kasong murder.
Nonot paman niini, padayon pa nga gina imbestigahan sa mga awtoridad ang maong Insidente aron matino ang tinuod nga nahitabo sa maong insidente.
