Gipataktak sa serbisyo sa PNP Internal Affairs Service (IAS) ang 11 pulis nga nalambigit sa moonlighting o nagtrabaho isip escort sa Chinese national nga matod pa adunay kalabutan sa POGO.
Gilangkuban ang nahisgutang mga pulis sa 6 ka mga police commissioned officers, 1 ang police leutenant colonel ug lima ang non-commissioned officers.
Gipahayag ni PNP Internal Affairs Service Inspector General, Atty. Brigido Gulay, nasayran nila nga nag-moonlighting ang mga nahisgutan sa dihang nakadawat sila og report nga nagkaaway ang duha ka pulis gikan sa Special Action Force sa usa ka subdivision sa Alabang niadtong Mayo 2024.
Sa dihang giimbestigahan nila ang kagubot, nadeskubrehan nga duha ka SAF Commando nga nag-away sa Alabang ang naka-duty unta kini sa Zamboanga. Girekomenda sa IAS nga matanggal sa serbisyo ang duha ka pulis ug ang siyam nga nalambigit sa moonlighting gumikan kay adunay falsification ug pagpangilad. Mihimo usab ug inspeksyon ang IAS sa mga unit aron masayran kung si kinsa pa ang wala nagtrabaho ug insakto.
Sa higayong maaprubahan ang rekomendasyon sa IAS nga pahawaon ang 11 ka mga pulis sa serbisyo, mawad-an ang mga nahisgutan ug mga benepisyo susama sa pension ug uban pa.
