DAVAO REGION- Hustisya karon ang singgit sa Pamilya sa usa ka senior high school nga tinun-an human nga gipusil patay sa Purok 13, Barangay Manay, Panabo City.
Buot karon sa kabanay nga madakpan sa mga otoridad ang mibuhat sa maong krimen.
Kahinumduman nga subay sa imbistigasyon sa kapulisan nga nahitabo kini pasado alas siyete sa gabii samtang ang biktima uban ang iyahang classmates aron nga mamalit ug materyales sa project sa eskwelahan.
Apan sa ilahang pag-uli sumala pa gisundan kini ug armadong grupo nga nagsakay ug motorsiklo nga ang mga suspek nakasuot ug jacket unya naka bonnet ang ulo.
Nagsakay sumala pa ang mga suspek sa Bajaj nga motorsiklo ug kalit kini nga mihunong sa ilahang atubangan ug gikuha ang mga cellphone sa nahisgutan ug gipusil kini hinungdan sa iyahang kamatayon.
Nakadagan sumala pa ang mga kauban sa biktima ug nakapangayo tabang naidtong tungura. Human sa maong panghitabo, dali nga misibat ang mga suspek sa wala matino nga direksyon.
Gilayon nga nagpahigayon ug hot pursuit operation ang kapulisan.
