Gibasura sa Sandiganbayan ang P276 million forfeiture case batok nila kanhing Pangulong Ferdinand Marcos Sr. ug kanhing First Lady Imelda Marcos.
Sa traynta nga panid sa resolution nga gipaguwa niadtong Oktubre kuatro, gikanayon sa anti-graft court ang hilabihan nga pagkalangay sa kaso sa bahin sa Presidential Commission on Good Government (PCGG).
Sumala sa korte, dili kaya nga hatagan ug patas nga pagtaral ang mga defendant tungod kadaghanan sa mga posibleng testigo ang mipanaw na ug ang ilahang documentary evidence ang dili na makaplagan gumikan sa kadugayon na sa kaso nga niabot na sa 37 ka tuig nga pagka-ong-ong sukad nga giduso kini niadtong 1987.
Gipahayag sab sa Second Division sa korte nga ang nahibilin nga defendant nga si kanhing First Lady Imelda Marcos ang 95 anyos na hinungdan nga ang iyahang abilidad aron nga motestigo ug hinumdumon ang mga panghitabo nga sigurado nga hinay na ingon man ang iyahang panglawas.
Dugang pa sa korte nga walay katakos nga motestigo sa nasampit nga hisgutanan ang mga anak sa mga defendant nga sila Pangulong Ferdinand Marcos Jr, Sen. Imee Marcos ug Irene Marcos-Araneta tungod menor de edad pa lamang sila niadtong nahitabo ang sumala pa ilegal nga mga transaksiyon nga adunay kalabutan sa Pinugay Estate nga 53 ka tuig na ang nakalabay.
Kahinumduman nga giduso sa PCGG ang nasamit nga forfeiture case batok sa pamilyang Marcos niadtong Hulyo 21, 1987 sa tinguha nga mabawi ang P276 million nga kantidad sa mga kabtangan nga sumala pa “nakaw na yaman” sa magtiayong Marcos sa panahon sa Martial Law.
Kalakip na niini ang kayutaan ug unom ka mga condominium units sa California, USA, ingon man ang duha ka lote ug duha ka condo units sa Baguio city, usa ka residential building sa Makati city ug usa ka residential lot sa syudad sa Maynila.
Lakip sab ang Pinugay Estate sa Tanay, Rizal nga nakuha sumala pa ni kanhing Pangulong Marcos Sr. gikan sa Government Service Insurance Sytem pinaagi sa paggamit sa iyahang crony nga si Roman Cruz Jr.nga isip iyahang dummy nga dugay na usab nga mipanaw.
Apan gibutyag sa korte nga ang lack of diligence sa komisyon sa paghupot sa nasampit nga kaso ang misangpot sa hilabihan nga pagkalangay sa proceedings o pagtaral sa kaso.
