Laraw karon sa mga awtoridad sa Zimbabwe nga pangihawon ang anaa sa 200 ka mga elepante aron nga masudlan ang nagkutoy nga tiyan sa mga katawhan nga nag-antos sa hilabihang kagutom gumikan sa nagkagabing huwaw nga ilahang nasinati-an sa nakalabay nga upat ka dekada.
Tungod sab kini sa epekto sa El Nino, dili na mapahimuslan ang mga gipangtanom sa southern Africa, nga nakaapekto sa 68 milyon nga mga katawan sa rehiyon.
Ipang-apud-apud sumala pa ang karne sa mga elepante sa mga komunidad sa Zimbabwe nga apektado sa hilabihang kainit sa panahon.
Nasayran nga ang pag-ihaw sa mga elepante, ulahing ihimo niadtong 1988, nga nahitabo sumala pa sa Hwange, Mbire, Tsholotsho ug Chiredzi districts.
Kini human sa desisyon sa sikbit niining nasud nga Namibia nga miihaw sab ug 83 ka mga elepante niadtng nakalabay nga panahon ipanghatag ang karne sa mga taong apektado sab sa grabing kainit.
Kapin 200,000 ka mga elepante ang gibana-banaan nga anaa sa conservation area sa lima ka mga southern African countries nga Zimbabwe, Zambia, Botswana, Angola ug Namibia.
Tugod niini, ang rehiyon ang adunay dakong populasyon sa elepante sa kalibutan.
Sumala kang Farawo, ang himuong pag-ihaw sa mga nasampit nga hayop mao ang kabahin sa pamaagi na sab aron nga makunhuran ang ihap sa mga dagkong kahayupan sa ilahang nasud sa ilahang parke, nga angay lamang sa ihap nga 55,000 elepante.
Nasayran nga anaa sa kapin 84,000 ang populasyon sa elepante sa Zimbabwe.
Tungod sa hilabihang kainit sa panahon, permi sumala pa nahitabo ang engkuwentro sa mga tawo ug elepante sa pagpangita ug pagkaon.
Sa miaging tuig, 50 ka mga tawo ang nangamatay sa Zimbabwe gumikan sa elephant attacks.
