Mokabat sa kapin tunga sa milyon ang nakumpiska nga iligal nga droga atol sa pagsilbi sa warrant of arrest kagabii.
Subay sa report sa kapulisan sa Davao City Police Office pasado alas siyete ang takna kagabii, gilusad ang pagsilbi sa warrant of arrest sa Purok 6, Brgy. 23-C,ning dakbayan sa Davao.
Giila ang dinakpan nga si DODGE QUITEL EULOGIO alias “DONDON”, 39 -anyos, ulitawo, construction worker ug residente sa nasampit nga lugar.
Gidakop ang nahisgutan tungod sa kasong Robbery ug kalapasan sa RA 9165 nga gikonsidera nga nag-una sa listahan sa kapulisan nga gipaguwa ni Judge Dante Lyz N. Viacrucis sa RTC Branch 6, Prosperidad, Agusan Del Sur.
Samtang gipahigayon sumala pa ang pagkapkap sa supek, nakumpiska sa kapulisan ang kinsi ka mga pinataas nga pakete sa iligal nga droga kon shabu nga sa kinatibuk-an adunay kantidad nga Php506,532.
Sa karon ang dinakpan ang anaa sa kostudiya sa Sta. Ana PNP ug gihulat na lamang karon ang kamanduan gikan sa korte.
