DAVAO CITY- Dako ang pagtoo sa mga myembro sa Kingdom of Jesus Christ (KOJC) nga ang nag-unang rason sa pagmuntar og checkpoint sa atubangang bahin sa ilang simbahan mao ang laraw nga makit-an ug madakpan si Pastor Apollo Quiboloy.
Kini ang sukwahi sa una nang gipasabot sa Police Regional Office XI nga kabahin lamang kini sa pagmintinar sa kalinaw ug kahapsay sa dakbayan pinaagi sa pagpahigayon og police visibility.
Apan sumala pa sa mga myembro sa KOJC, dili katuohan ang gikanayon sa maong buhatan hilabi pa nga kung boot huna-hunaon nakahatag na kini og disturbance alang sa katawhan.
Kahiumduman nga una nang gipaabot sa maong simbahan ang kabalaka sa mga estudyante ug mga bata sa maong dapit ngadto sa mga otoridad sanglit nakahatag na kini og disturbo.
Gipunting sa mga myembro ang pagsuot og full battle gear sa SWAT Team butang nga gikahibulong nila hilabi pa nga makita lamang ang susama niining sitwasyon sa mga dagko nga operasyon.
Daan nang gikwestyun sa KOJC ang mga lihok nila PNP Chief Rommel Francisco Marbil ug PRO XI Regional Director Nicholas Torre III.
Hinoon, gipasabot sab ni P/Maj. Catherine dela Rey, tigpamaba sa PRO XI nga dili na bag-o ang pagmuntar og checkpoints uban ang pagdeploy og unit sa mga operational activities.
Dugang pa sa opisyal nga mamahimo lamang negative ang maong lakang kung aduna usab gihunahuna nga negative ang usa ka indibidwal apan kung ikonsidera kining kabahin sa crime prevention, mamahimong ma-appreciate sa katawhan ang ginabuhat sa mga kapulisan.
