Mitanyag ug P20 milyon nga reward ang Kingdom of Jesus Christ (KOJC) kung si kinsa ang makahatag ug inpormasyon sa naghatag ug donasyon nga P10 milyon sa gobyerno isip reward sa puganteng si Pastor Apollo Quiboloy.
Gipahayag ni Atty. Israelito Torreon, abogado ni Quiboloy, gusto sa KOJC masayran kung si kinsa ang nagpaluyo sa P10 milyon nga gihatag kang Department of Interior and Local Government (DILG) Secretary Benhur Abalos.
Dugang pa niini, iligal kuno ang pagdawat ug kwarta gikan sa pribadong tawo ubos sa Republic Act 6713 section 70 kung diin klaro nga gidili ang pagdawat sa mga public officials ug bisan unsang kwarta gikan sa pribadong tawo.
Gusto usab sa KOJC nga masayran kung si kinsa ang nagpaluyo sa pagmugna ug assasination team nga mao kuno ang mupatay kang Quiboloy.
Ang nahisgutang P20 milyon ang nagagikan sa nagkadaiyang miyembro nila sa tibuok kalibutan.
Kung kahinumduman niadtong Hulyo 8, gipahibalo sa DILG nga adunay gitanyag nga P10 milyon nga reward kang bisan si kinsang makatudlo sa nahimutangan ni Quiboloy ug tag P1 milyon sa mga co-accused niini.
