DAVAO CITY- Subling gilusad kaganihang buntag ang road clearing operation sa Bangkerohan Public Market kini human nga namatikdan ang pagbalik sa mga sidewalk vendors.
Gipangunahan sa Davao City Ancillary Service Unit ang maong operasyon sa nasampit nga merkado pinaagi sa paghipos sa mga paninda nga anaa sa daplin naglaray nga bisan ug anaa na kini sa karsada nga bahin ug wala na kini nakasubay sa 1/3 ug 2/3 policy sa syudad.
Ubay-ubay usab ang nasita sa mga personahe sa ASU uban ang CTTMO. Adunay gipangdala nga duha ka mga dumptruck ang ASU aron nga kargahan sa mga makumpiska nga ga lamisa ug mga baligya nga nagtinda sa daplin sa karsada.
Kahinumduman nga una ng gipatuman niadtong Hunyo ang road clearing sa nasampit nga palengke tungod sa kaguot sa karsada gumikan sa mga nagdasok nga mga sidewalk vendors nga moresulta sa pagkabalda sa dagan sa mga sakyanan.
Atol sa gipahigayon nga opewrasyon niadtong panahuna, ubay-ubay ka mga istruktura ang gipagbungkag nga anaa sa tunga ug daplin sa karsada.
Sa karon ang mga apektadong vendors gipahiluna na sa usa ka dakong hawan sa nasampit gihapon nga lugar nga gipanagiyahan sa pribadong kompanya.
Plano sab sa lokal nga panggamhanan nga ang kilid nga lane sa karsada ang himuon kini nga pay parking area.
