DAVAO DEL NORTE- Gipasalig ni Davao Del Norte Governor Edwin Jubahib ang pagpadayon sa mga programang iyang nasugdan pinaagi sa paghatag og prayoridad sa sektor sa agrikultura.
Kini ang giluwatang pamahayag sa gobernador atol sa pag-resume niini sa iyang katungdanan sa Davao del Norte RDR Gym, kagahapong adlawa. Sumala pa sa opisyal nga mas labing tagaan niiini og pagtagad karong panahona ang mga mag-uuma pinaagi sa pagpalit sa ilang mga abot aron nga makabaton kini og makatarunganong presyo.
Dugang pa niini nga dili mahimong babag ang 90 ka adlaw niining preventive suspension aron dili mapadayon ang mga maayong plano nga nadelatar alang sa probinsya.
Gawas niini, gikanayon ni Jubahib ang padayong pagsuporta sa mga kapulisan aron masiguro ang peace and order sa Davao del Norte.
Sa pikas bahin, nagpaabot og pasalamat ang gobernador ngadto sa katawhan nga wala gayud nibiya sa pagsalig ug pagsuporta kaniya hilabi pa sa mga local officials, department heads, mga empleyado sa kapitolyo, ug mga lumad sa Davao del Norte bisan paman sa mga gikaatubang niining kaso.
Ning kasamtangan, ginahulat pa sa opisyal ang resulta sa imbestigasyon kalabot sa pag-imbargo niini og sakyanan sa usa ka public official ug ang kaso batok sa NORDECO aron mahibal-an sa katawhan ang kamatuoran.
