DAVAO CITY- Daling gipahikling ang mga residenteng nahimuyo sa may Kalye Apeke, Barangay Calinan, Poblacion District ning dakbayan sa dihang mibigay ang usa ka bahin sa dike sa maong dapit tungod sa nasinatiang kusog nga bul-og sa tubig sa sapa kagahapon sa hapon.
Alayon sa mga nasinatiang pag-ulan ug makusog nga bul-og sa tubig sapa kagahapong adlawa, gikatahong mibigay ang usa ka bahin sa maong dike sa nga hinungdan sa pagkahulog ug anod usab sa usa ka lalake nga giilang si Wilfredo Hambog, anaa sa hamtong nga panuigon ug residente sa nahisgutang dapit.
Sa pakighinabi sa Bombo Radyo Davao ngadto sa biktima, gisaysay niini nga igo lamang unta niini gibadlong ang iyahang ig-agaw nga mag igmat sa ka kusog na sa bul-og sa tubig sa sapa. Apan sa wala damha, kalit lamang nga nahugno ang river dike nga ilahang gitindugan nga miresulta sa pagkatagak niini og naanod kini siya sa sapa.
Matud pa niini nga igo na lamang kini migunit sa gapnod o kahoy og nagpadala sa bul-og sa tubig. Dugang pa niini na layo layo gayud ang iyahang naanudan, diin gikan sa may Kalye Apeke kun diin nahugno ang maong dike, didto na kini naka gunit og ugat sa kahoy sa may Riverside banda og sipte ng naluwas tungod sa dugang tabang usab sa mga residente.
Pagsaysay pa ni Wilfredo nga nakahiagom gayud kini og mga samad sa kalawasan niini partikular na sa may tiyan, tuhod og tiil tungod sa maong panghitabo kaniya.
Ning kasamtangan ang maong indibidual kauban ang iyahang mga kabanay og kasilinganan nga labing naapektuhan sa insidente ang anaa na sa Evacuation Center.
