DAVAO DEL SUR- Mag-atubang og kasong pagsupak sa RA 9165 ang usa ka ulitawo human nga naaktuhan sa usa ka barangay tanod nga nagdala og mga putos sa pinauga nga dahon sa marijuana.
Subay sa report gikan sa Sta. Cruz Municipal Police Station, pasado alas kuatro sa hapon, usa ka Junel Lumbayo nga barangay tanod sa Astorga, Sta. Cruz, Davao del Sur, ang nanguha og kumpay sa Purok Matatag, Barangay Astorga, apan iyahang nakita ang usa ka motorsiklo nga giparking daplin sa karsada nga gipanag-iyahaan ni alias Pedro, 21-anyos ulitawo ug residente sa Purok 4, Barangay Baracatan, Toril, ning dakbayan.
Sumala pa sa tanod nga mituyok sumala pa ang drayber sa likod nga bahin sa punuan sa kahoy ug adunay gipangita.
Gipanid-an lamang kini sa tanod apan pagka-taud-taud nakita niya si alias Pedro nga adunay gikuha nga gisulod sa iyahang bag.
Gumikan sa iyahang pagduda, giduol niya si alias Pedro ug iyahang nakita mismo sa kamot sa batan-aon ang mga putos sa pinauga nga dahon sa marijuana ug narekober sab ang laing unom pa nga putos sulod sa iyang bag.
Gilayon kining gireport sa mga otoridad ug nadakpan ang suspetsado.
Gibana-banaan nga anaa sa 25 grams ang pinauga nga dahon sa marijuana diin adunay standard drug price nga mokabat sa P3,000.
Sa karon ang dinakpan ang gipasakahan na og kaso samtang gikostudiya kini sa Sta. Cruz PNP.
