DAVAO DE ORO- Nadakpan ang usa ka Baranggay Kapitan atol sa gipahigayon nga implemantasyon sa Search Warrant sa Prk.Uno, Brgy. Batinao, New Bataan Davao De Oro.
Subay sa report sa kapulisan giila ang Kapitan sa baranggay nga si Ronald B Calamba Sr. 43-anyos ug usa ka byudo nga gikonsidera nga usa ka High Value Individual.
Gipangunahan sa Regional Drug Enforcement Unit kon RDEU ang operasyon pasado alas sais ang takna sa buntag sa panimalay niini.
Pinaagi sa hiniusang pwersa sa RPDEU11, New Bataan MPS, Technical Support Company, RMFB11 ug NISG-EM nakumpiska ang mga pakete sa iligal nga droga kon shabu nga sa kinatibuk-an mitimbang kini ug katorse gramos nga adunay standard drug price nga mokabat sa P95,200.
Samtang narekober sab sa panimalay niini ang mga drug paraphernalia sama sa duha ka buok nga glass tube improvised tooter ug usa ka glass tube nga adunay crystalline substance, lighter ug uban pa.
Gawas sa iligal nga droga, nakumpiska sab ang armas niini nga .45 Cal. pistol nga adunay duha ka magazine ug 21 ka mga bala nga karon gikostudiya sa New Bataan MPS.
Giklaro sa otoridad nga ang armas nga nakumpiska sa Kapitan ang adunay mga dokumento. Sa pagkakaron ang nasampit nga Brgy. Kapitan ang anaa karon sa kostudiya sa kapulisan sa New Bataan.
