DAVAO CITY- Mataktak sa trabaho ang unom ka mga sakop sa Ancillary Services Unit (ASU) human kini nagpositibo sa iligal nga droga atol sa surprise drug test.
Gikanayon ni Paul Bermejo ang labaw sa ASU ning syudad nga dili magduha-duha sa pagtanggal ang buhatan sa mga nagpositibo nga mga personahe niini nga kabahin kini sa ilahang kampanya nga luwas sa iligal nga droga ang ilahang buhatan nga subay sab kini sa mando sa LGU Davao.
Giklaro sa nahisgutang opisyal nga sa karon wala na nila gipa-duty ang mga nagpositibo ug dili na usab ma-renew ang ilahang kontrata nga puro mga job order sa syudad. Nasayran nga una ng gipailawom sa confirmatory test ang unom nga una ng nagpositibo sa iligal nga droga.
Kahinumduman nga sa bahin sab sa CSU adunay nagpositibo sab sa gipahigayon nga random drug test sa miaging mga semana.
Sa karon wala pay gipaguwa nga mga pangalan sa mga nagpositibo nga mga tarabahante sa LGU Davao.
