DAVAO CITY – Mitahan ang duha ka mga personal assistants ni Kingdom of Jesus Christ leader nga si Pastor Apollo Quiboloy sa National Bureau of Investigation (NBI) sa Davao City kagahapon, Abril 4.
Personal nang miatubang sila Ingrid Canada ug Jackielyn Roy sa NBI-Southeastern Mindanao Regional Office bandang alas-9 sa buntag ug nakapiyansa og tig- P80,000 matag usa sa Regional Trial Court Branch 12.
Nagdala ang ilang pagsurender sa kinatibuk-ang ihap sa mga kauban ni Quiboloy nga nag-atubang og kasong child abuse ngadto sa lima nga misumiter sa mga awtoridad diin nailhan sab ang uban nga sila Cresente Canada nga nasikop niadtong Abril 2; Paulene Canada, ug Sylvia Cemañes, nga parehong misurender ug nakapyansa nianang pagkahapon sa susamang adlaw.
Nagpabiling gawasnon si Pastor Quiboloy human nagsilbi og warrant sa Tamayong Prayer Mountain ug ubang mga dapit sa Davao City ug Samal Island ang hiniusang operasyon sa NBI, Police Regional Office XI, ug Criminal Investigation and Detection Group XI niadtong Abril 4.
Apan gikompirmar sa mga awtoridad nga nadawat sa iyang abogado ang maong warrant.
Gipasalig ni PRO XI director Brig. Gen. Alden Delvo nga nagpadayon gihapon ang manhunt ug ang hingpit nga kooperasyon sa mga law enforcement agencies aron masikop ang nagtago-tagong pastor.
Sa laing bahin, makigsabot ang mga opisyal sa NBI sa kampo ni Pastor Quiboloy alang sa malinawon nga pagsurender sa mga awtoridad.
Gikanayon ni NBI XI regional director Atty. Arcelito Albao, nakig-alayon sila sa legal counsel sa religious leader aron malinawon kining motahan, apan wala pa makatubag sa ilang hangyo ang kampo ni Pastor Quiboloy.
Dugang pa nga magpadayon ang hiniusang operatiba sa pagpangita kang Quiboloy hangtod nga wala pa mahuman ang 10 ka adlaw nga gilatid sa balaod.
Gikumpirma sa Police Regional Office 11 nga nagmugna na og tracker team ang kapulisan dungan sa paglusad og manhunt operation aron masikop na si Quiboloy human sa paghatud og warrant of arrest sa mga alegasyong pagpangabuso.
Sumala ni PRO 11 Spokesperson PMaj. Catherine dela Rey, wala pay ideya ang kapulusan kon asa karon ang gikahimutangan sa gitawag karon nga nga pugante nga si Quiboloy apan nagsugod na ang manhunt operation human sa pagdawat sa warrant of arrest nga giisyu sa Davao City Regional Trial Court Branch 12.
Dugang pa ni dela Rey nga bisan pa man nauna nang gihatag ang warrant of arrest batok kang Quiboloy gikan sa korte, ginahulat pa lamang ning kasamtangan ang Senate order aron mapaatubang na ang pastor sa mga senate hearings.
Dugang pang hangyo sa opisyal ngadto kang Quboloy nga itahan na lamang ang iyang kaugalingon aron dili na madungagan pa ang mga gikaatubang niining kaso.
via || Bombo LJF
