DAVAO CITY – Gikatakdang magpasang-at og resolusyon karong adlawa si Senador Bong Go nga sakop sa Senate Committees on Energy and Public Services kauban sila Sen. Francis Tolentino ug Sen. Bato dela Rosa, alang sa pag-imbestigar sa power interruption sa Island Garden City of Samal sa Davao del Norte, nga nagtumong sa pagdeterminar sa kapasidad ug kapabilidad sa electric supplier nga makatubag sa panginahanglan sa kuryente sa lugar.
Sumala pa sa senador, nagkataas ang heat index sa rehiyon, ug halos adlaw-adlaw ang brownout sa isla. Daghang mga tawo ang naapektuhan niini nga isyu, lakip ang ilang mga negosyo, panginabuhian, turismo, ug mga kagamitan sa adlaw-adlaw. Gipunting ni Go nga misaad ang Northern Davao Electric Cooperative kon NORDECO nga ayuhon ang problema, apan dul-an sa usa ka tuig nga matud pa wala kini nahimo.
Nangayo si Go og mga tubag niining mga pangutana ilabi pa nga mismong nitawag kini kang General Manager Elvera Alngog sa NORDECO aron mangaliyupo alang sa dinaliang serbisyo.
Naglaum siya nga ayohon sa kompanya ang trabaho niini ug dili usa ka torture sa mga lungsuranon nga andam magbayad alang sa usa ka tukma nga serbisyo. Nanawagan si Go sa NORDECO nga himuong tarong ang ilang trabaho ug nanghinaot nga mahibalik na sa normal ang suplay sa kuryente sa dili madugay.
Nag-awhag sab kini kanila sa pagpalambo sa ilang trabaho ug pag-alagad sa katawhan, tungod ilabihan kining gilauman sa mga Samalenyo.
via || Bombo LJF
