DAVAO CITY – Naglaraw si Tagum City Rey Uy nga himoong “independent city” ang syudad human sa nahitabong panagbangi sa Provincial Government of Davao del Norte bahin sa financial assistance alang sa mga residente nga naapektuhan sa baha.
Gikabutyag mismo sa mayon nga “more than qualified” na ang dakbayan sa Tagum nga mahibulag sa probinsya sa Davao del Norte.
Gibutyag kining laraw human wala makadawat ang tanang mga naapektuhan sa milabayng pagbaha og hinabang gikan sa probinsya.
Kahinumduman nga gikataho sa Provincial Disaster Risk Reduction Management Office (PDRRMO) nga dul-an sa 20,000 ka mga residente ang apektado sa pagbaha, nga sukwahi sa taho sa Disaster Risk Reduction Management Office sa syudad nga mokabat sa 43,000 ka indibidwal ang naapektuhan sa mga insidente sa pagbaha sayo ning tuiga.
Nagtuo ang mayor nga kini nga isyu maoy nakatampo sa iyang ideya nga himuong “independent city” ang siyudad aron adunay kaugalingong hurisdiksyon sa mga polisiya sa gobyerno, susama sa Davao City.
Iyang giangkon nga dili kini prayoridad ug dili kini iduso sa Kongreso.
Matod sa mayor nga dako kini og epekto sa kagamhanang probinsiyal labot sa National Tax Allotment.
Gisaulog karong panahuna ang ika-26 nga founding anniversary sa Tagum City gikan sa munisipyo ngadto sa pagka-siyudad sa Davao del Norte pinaagi sa Republic Act 8472 niadtong Marso 7, 1998.
